Page 145 - Алаатыыр Ала Туйгун. 2-с үйэтэ

Кулгаахтаах бөҕө
Истибэт гына,
Умайа турар
5830 Уот баргый
Кыһа ортотугар
Дьылыс гынан хааллылар.
Тоҕус дуолан бухатыыр
Тоҕус суккуур хара күөтүнэн
Тохтоло су ох
Күүгүнэччи күөттүү турар
Көмөлгөннөөх-сыралҕаннаах
Кытыастар кыһалара буолла.
Бу маннык
5840 Курай уотунан
Куугуначчы уһуурбут,
Барҕа-тэргэл уотунан
Бааҕыначчы ытыллыбыт,
Сириэһин уотунан
Сирилэччи оргуйа турар
Сирэлгэн итии
Кыһа ортотугар
Дьөлө сөҥөн сытынан кэбистилэр.
Өр да сыппыттарын билбэтилэр,
5850 Өтөр да сыппыттарын билбэтилэр.
Киһи эрэ буоллар
Уҥуох бэйэлэрэ уйадыйан,
Эт бэйэлэрэ
Эммэниһэн бардылар.
Мэккиспит мэккиэрдэрэ,
Күрэхтэспит күрэхтэрэ
Иккиттэн биирэ быһаарыллар
Мүччүргэннээх күннэрэ үүннэ быһыылаах.
Күнү-түүнү өйдөөбөтүлэр,
5860 Сырдыгы-хараҥаны быһаарбатылар,
Аан дойду барылын
Сабаҕалыы санаабатылар,
Хоччоххой хара куҥнара
Кутаа уот буолан,
Куугунуу умайда.
Силгэлэрэ-иҥиирдэрэ
Сириэһин уот буолан сирдьигинээтэ.
Хааннара хардьыгыныы оргуйан,
Таммах да хаалбакка,

- 141 -