Page 303 - Алаатыыр Ала Туйгун. 2-с үйэтэ

Кытарбыт болгуо курдугунан
12450 Сирилэччи ииктээтэ,
Сылаас паар курдук
Сырылаччы тыбыырда,
Баһаам үлүгэрдик
Барылаччы кистээтэ.
Алаатыыр Ала Туйгун
Атын үрдүгэр
Өксөкү кыыл курдук
Дап гына олоро түстэ,
Айаннатан астарда,
12460 Сиэллэрэн дьигиһиттэ,
Уурдаран-оҕустаран,
Дьабыдытан-дьалкытан,
Түһэн барда.
Өр да гыммата,
Өтөр да буолбата
Иитиллэн үөскээбит
Ийэ бараан дойдутугар
Эргиллэн кэллэ.
Киирбит килбиэн маҕан күннээх,
12470 Саппаҕырбат-өлбөөдүйбэт
Сандаар маҕан халлааннаах,
Сулуктуйбут нуолур күөх мастаах,
Суһуктуйбат торҕо күөх оттоох,
Көлбөҕүрбэт-өлбөөдүйбэт
Күндэлэс маҕан күөллэрдээх,
Көппөт көнчөхтөөх,
Барбат бараахтаах,
Кэхтибэт кэҕэлээх,
Быстыбат быйаҥнаах,
12480 Уолбат уйгулаах,
Өрөҕөр көҕүллээҕэ
Үөрдүһэн үөскээбит,
Атырдьах туйахтааҕа
Арыаллаан айгыстыбыт,
Көтөр-сүүрэр көччүйбүт,
Киһи-сүөһү тоҕуоруйбут,
Күн Тэгиэримэ Эбэ хотун
Килэрийэр киинигэр,
Дьогдьойор саалыгар,
12490 Туналыйар ньууругар,
Таалалыыр таманыгар,

- 295 -