Page 39 - Алаатыыр Ала Туйгун. 2-с үйэтэ
P. 39
Төттөрү төкүнүйдэ,
Кылыгырыыр-кыҥкыныыр
Кыаһаан тимир түүлээх
Кылбаа маҕан
Кыталык кыыл буолан,
Кыырай халлаан
1280 Кыладьыйар кырсын диэки
Кыһыыра көтөн таҕыста.
Алаатыыр Ала Туйгун
Атын үс төгүл
Хоруутуурун кытта
Араҕас сиэр ата
Аттыгар кэлэн
Харыс гына түстэ.
Атын үрдүгэр
Өксөкү кыыл курдук
1290 Дап гына олоро түстэ да,
Барыах буолбут сирин диэки
Айаннаабытын курдук
Айаннаан дьабыдытан,
Дьалкытан түһэн бара турда.
Анысханнаах салгыннаах
Аас мэн илгэн байхаллары
Ааһыталаан истэ,
Буркуннаах-будурбаннаах
Муус кудулу муоралары
1300 Уҥуордаан уһуутаата,
Иннэ-саҕата биллибэт
Элэй-мэлэй
Эрбэдиһин дуоһун
Иччитэх куйаар дойдунан
Эҥсэлийэн ааһан истэ,
Кырса-саарба кыыллар
Кыттыһан үөскээбит
Кыыдааннаах салгыннаах
Кытыт дьулаҕай дойду устун
1310 Тыырдаран кыдылытан
Тахсан барда,
Сибииктэ оттоох
Сэппэрээк ойуурдаах,
Сэдэх мастаах
Сиэрэй күөх сиргэ
Тиийэн кэллэ.
- 35 -
