Page 401 - Алаатыыр Ала Туйгун. 2-с үйэтэ

Аҕыс тоҕойдоох
Айыы-кэрдии маҕан аартыктара
Аҥаарыйа аһылынна.
Эдьээн Иэйэхсит эргийэр,
Ахтар айыыһыт айгыстар,
Дьөһөгөй айыы төлкөлөнөр,
Сэттэ нэлбиргэлээх
16670 Сиэллээх сиэги маҕан
Аартык силэлиннэ.
Сиэттиспит сирбититтэн
Сэттэ салаалаах
Сирэм күөх от
Сириэдийэ чэлгийдин,
Арыаллаабыт сирбититгэн
Аҕыс салаалаах
Ача күөх от
Аҥаарыйа астын,
16680 Тоҕуоруйбут сирбититгэн
Тоҕус салаалаах
Торҕо күөх от
Нусхайа үүннүн,
Халыҥ халҕаммыт сэгэйбэтин,
Суон сүллүгэспит төлөрүйбэтин,
Туруорбут сэргэбит иэҕэйбэтин,
Аспыт чэчирбит хагдарыйбатын,
Уулуур ойбоммут хайыарбатын,
Оттубут уоппут умуллубатын,
16690 Өрөҕөр көҕүллээхпит үөрдээтин,
Атырдьах туйахтаахпыт арыаллаатын,
Көтөр кынаттаахпыт мэнээктээтин,
Көп-сөгөлөөн доҕордостун,
Баай Байанай аргыстастын,
Эдьээн Иэйэхсит эргийдин,
Ахтар Айыыһыт салалыннын,
Дьөһөгөй айыы дьүөрэлэстин,
Төрөтөр оҕо уйаланнын,
Иитэр сүөһү күрүөлэннин,
16700 Кэнчээри ыччат кэскиллэннин,
Ороһу оҕо тускулланнын,
Төрүүр төрүөх төлкөлөннүн,
Уйгу-быйаҥ кэскиллэннин,
Өрөгөй-талаан үрдээтин,
Саргы-дьаалы салалыннын.
393 -