Page 68 - Алаатыыр Ала Туйгун. 2-с үйэтэ

Толору толуу ньуурдаах,
2520 Килбигэ суох
Кэрис бараан
Кэрэ дьүһүннээх,
Иҥнигэһэ суох
Эрдээх-хорсун бэйэлээх,
Уурбут-туппут курдук
Уран-нарын уостаах-тиистээх,
Уоттаах кыһыл саһылы
Таҥнары туппут курдук
Кыстык тэтэрхэй* имнээх,
2530 Икки тыһы кырынааһы
Сыыйа тарпыт курдук
Тыргыллаҕас хаастаах,
Үөрбүт курдук
Үтүө дьүһүннээх,
Хайҕаабыкка дылы
Нарын майгыннаах,
Сөбүлээбит курдук
Сэмэй сигилиилээх,
Эйэргээбит курдук
2540 Эйэҕэс быһыылаах,
Ис киирбэх
Ириэнэх хааннаах.
Насыыба киһи
Наадыйан көрдөҕүнэ,
Таҥас бүтэй
Таман этэ
Сандааран көстөр.
Кыраҕы соҕус киһи
Кыһанан көрдөҕүнэ,
2550 Кыһыл эт бүтэй
Кылбайар ыраас унуоҕа
Кылбайан көстөр.
Уурас киһи
Одуулаан көрдөҕүнэ,
Унуох бүтэй
Сэлиилиин долгуйар.
Чинчийбит киһи
Сирийэн көрдөҕүнэ,
Сэлии бүтэй
2560 Сигилиитэ даҕаны
Биллэргэ дылы гынар.
- 64 -