Page 218 - Неизвестное название

9100 Үллэйэн таҕыста.
Айыы сирин диэки айаннаата,
Күн сирин диэки күөрэйдэ.
Кынатыттан сындыыс
Чаҕылдан кыырайда,
Табыталыттан сааллар
Чаҕылҕан чаҕылыйда,
Тоҕус дохсун этиҥ
Доҕордоһон дуораһыйда,
Аҕыс дьаҥсал этиҥ
9110 Ааспат аргыстанна.
Сэттэ тэргэн этиҥ
Ньиргиэрдээх сирдьиттэннэ,
Дохсун самыырынан суодуйан,
Ахсым ардаҕынан айгыстан,
Күүстээх буурҕанан көтөҕүллэн,
Күисүйэн-сапсыйан
Күөрэйэн көтөн истэ.
Өр да көппүтүн билбэтилэр,
Өтөр да көппүтүн билбэтилэр.
9120 Хараҥа дойдуттан халбырыйда,
Күлүк сиртэн күөрэйдэ.
Күн сирэ
Күөрэйэ долгуйан,
Көҕөрө унааран,
Күлүмүрдээн көһүннэ.
Айыы дайдыта
Арылыйа чэлгийэн,
Аһыллан-анаарытан кэллэ.
Сындалҕаннаах күн
9130 Сандааран таҕыста,
Килбиэн маҥан күн
Килбэччи тыкта.
Орто дойду
Ойуулаах-оһуордаах
Ото-маһа
Унааран-долгуйан
Оһуорданан көһүннэ.
Сир ийэлэрэ
Тэрээх илими
9140 Тиирэ таппыт курдук,
Дьэрэкээннэнэн-киэркэйэн,
Дьоҕулланан көһүннэ.
- 217 -