Page 231 - Неизвестное название

Тоҥсуйан лаҥкынатта.
Ол гынан баран
Саҥа саҥара,
Тыл кэпсии,
Өс тобула турбут
9750 Хоһоонун эгэлгэтэ
Маннык буолбут эбит:
— Дьиэ-буо, дьиэ-буо!
Бу кыталыктаах
Кыйаадыма Эбэ хотун
Килэдийэр киинигэр,
Туналыйар ньууругар,
Туйгуннуур уорҕатыгар
Олохсуйан үөскээбит
Тойон Дьоҥсоруун Баай оҕонньор,
9760 Хатын Дьаҥсарыын Баай эмээхсин
Этэр тылым эгэлгэтин
Истэ сэргэҕэлээҥ,
Көрө бүдүүлээҥ.
Туох дойду
Дьулаҕайын туура тэбинэн,
Туран кэллиҥ диэн,
Соноҕос ат уйбат
Суон-дьэҥкэ сурахпын
Суруур буоллаххытына,
9770 Солоҥдо тураҕас аттаах
Тустуулаах Дьуруо Бөҕө диэн
Күн өркөн уустарын
Күүстээх бухатыырдара
Тиийэн кэллим.
Туох наадаҕа
Кэллиҥ диэтэххитинэ,
Сэттэ былас суһуохтаах
Нэлэмэн Куо диэн
Кыыстаах эбиккит.
9780 Ону кытта биһиги
Окко түспүт оҥоруубут,
Сиргэ түспүт сэрибиэйбит,
Куппут-сүрбүт биир
Төлкөлөөх сурахтааҕа.
Ол иһин
Ыраах сиртэн ыйдаран,
Дьоһун дойдуттан сураһан,

- 232