Page 227 - Неизвестное название

Кытыан ойуур кытыылаах,
Ньуолур күөх
Суугунуур тиа тулалаах,
Чараҥ-хахыйах дьарҕаалаах,
Хампа күөх харыйа хаймыылаах
Налыы сыһыылар,
Намылҕа чараҥнар,
9580 Саһыл кырыстар,
Сэнэҕэ тыалар,
Таалар хонуулар устун
Сирин-дойдутун сэргээн,
Отун-маһын оһуордаан,
Салгынын таптаан,
Тарда соҕус уоҕун мөлтөтөн,
Обунун тохтотон,
Наҕылыйа соҕус
Сиэллэрэн-дэгэтэн,
9590 Айаннатан дабдытан истэ.
Өр да айаннаабытын билбэтэ,
Кыталыктаах кырдаллаах
Кыйаарыма Эбэ диэн,
Сир киэнэ
Киинэ сиргэ,
Дайды киэнэ
Дьалкыйар дайдыта
Тиийэн кэллэ.
Туналыйар толуу дойду
9600 Туолан томтойон көһүннэ.
Бу дойду тураахы туруйалаах,
Кыстыыр кыталыктаах,
Халбарыйбат хаастаах,
Барбат бараахтаах,
Күрэммэт көнчөхтөөх,
Өрүөбэт өтөннөөх,
Кэхтибэт кэҕэлээх,
Быстыбат былдьырыыттаах,
Куоппат хараҥаччылаах,
9610 Тэлэһийбэт дьиэрэҥнээх,
Ырбат ырыа чыычаахтаах,
Тохтообот тураҕас суордаах,
Үргүлдьү үгүрүөлээх,
Көрүлүүр күөрэгэйдээх,
Оонньуур орулуостаах,
- 228 -