Page 265 - Неизвестное название

Эргийэн-туоруйан,
Иһэллэр быһыылаах диэн,
Көрө охсоору,
Күүгүнэһэ түстүлэр,
Билэ охсоору мэҥилэстэһэн,
Тыын быһаҕастарынан тыынан,
Одоҥ-додоҥ ойуолаһан,
Үрүө-түрүө өрүкүһэн,
Кытаҕас кыргыттар
11130 Кылыс курдук кындаҥнаһан,
Быһый уолаттар
Бастаан быыраластылар,
Модьу бөҕөстөр
Мөтөрүһэн таҕыстылар,
Хорсун бөҕөлөрө
Курайа сүүрэн,
Тумул-тумул аайы
Тоҕуоруһан турдулар,
Булгунньах аайы
11140 Бөлүөҕэн муһуннулар.
Ол икки ардыгар
Уорааннаах уллуҥах тыаһа уораһыйда,
Торҕонноох туйах тыаһа дуораһыйда
Ньиргиэрдээх тиҥилэх тыаһа ньиргийдэ.
Сибилигин аҕай
Үөрүү-көтүү
Өрөгөйдүүр дуу,
Алдьархай бөҕө
Ааҥныыр дуу,
11150 Иккиттэн биирэ быһаарыллар
Мүччүргэннээх-былдьаһыктаах
Көһүппүт күн күөрэйдэ,
Кэтэспит кэм
Кэллэ быһыылаах.
Куттара үргэн
Куйахалара күүрдэ,
Эттэрэ саласта,
Иэннэрэ кэдэрийдэ,
Сүргэлэрэ долгуйда,
11160 Сүһүөхтэрэ хамсаата.
Нохтолоох тойон сүрэхтэрэ
Тоҕус токур-бакыр
Ойоҕосторун иһигэр

- 264 -