Page 380 - Неизвестное название

15980 Хаалыаҕынааҕар харайан көрүөм,
Дьоҕойон туһаныам буоллаҕа.
Ону туох диэн толкуйдуугун,
Ханнык диэн хардалыыгын,
Эппиэттиир тылгын эт,
Ис санааҕын иһитиннэр эрэ,
Нойоон! — диэтэ.
Инньэ диирин кытта
Тустуулаах Дьуруо Бөҕө
Сэрэйэ санаата,
15990 Дьиксинэ быһыытыйда.
Бу туттаран туран
Тута мэлитэр,
Көрдөрөн туран
Көстө көтүтэр,
Ааһар бөҕө албастаах
Аҥардам абааһы обургу дьаалы
Сыыһа туттардаҕына,
Халты харбаттаҕына,
Суолун мунурдаппат,
16000 Биэрэгин биллэрбэт,
Эрэйдээх-буруйдаах,
Эриирдээх-мускуурдаах
Элбэх эккирэтиинэн,
Сындалҕаннаах сырыынан
Ситтэрэр күтүр буолуо дии
Санаата да,
Саманнык диэн
Саҥа саҥара турда:
— Дьиэ-буо, дьиэ-буо!
16010 Хайаттан хайа ыстаммыт
Ааһар бөҕө албастаах
Аҥардам бухатыыр диэн
Албан аатыҥ
Аан дойдуга атыыр буолан
Лаҥкыначчы кистээн,
Дьоһун сураҕыҥ
Улуу дойду оҕуһа буолан
Лөҥкүнэччи мөҥүрээн,
Сураҕырбыт бэйэҥ.
16020 Ол гынан баран
Тэгил дойдуттан
Тэҥнээххин булан,
- 377 -