Page 439 - Неизвестное название

Кылас часкыыр буола турда:
— Алаатыгар-улаатыгар!
Түгэх дайды түркүннээҕэ,
Чиэрэс сирим диэлимэрэ,
Атын дайдым албастааҕа,
Албын-көлдьүн аҥардама,
Түөкүн күтүр түптүйэтэ,
18610 Ийэ дьэллик идэмирэ,
Кэргиир торҕох кэлтэрэйэ,
Кэргэн буолан кэбэлийэн,
Ойох булан оччороҥноон,
Аргыс буолан аҥардамнаан,
Билээччи гиэнэ бэрдэ буолан,
Сымыйалаан силлэҥнээбит,
Албынынан аллаҥнаабыт,
Абаккабын-сүттүкэбин,
Аанайыкпын туонайыкпын!
18620 Хаарга хаамтардаҕын,
Сииккэ-буорга сиэллэрдэҕин,
Муораны түгэҕинэн муҥнаатаҕын,
Далайы сиксигинэн накаастаатаҕын,
Иҥнэри-таҥнары эрэйдээтэҕин.
Сибилигин аҕай
Сирэйдэри-харахтары
Сиритэ тэпсиэм,
Уостары-тиистэри
Ойута үктүөм,
18630 Ураҕаһынан үүрэн,
Утаарарым буолуо,
Түҥкэтэх үөдэҥҥин
Дьүгэлитэн көрөөхтүөм,
Киэр буолууй!
Кэбэлийэ тардыый!
Тоҕо сымыйалаан
Тута албыннаатыҥ,
Тыыҥҥын иһиллиэм,
Тыҥыраххын сарбыйыам,
18640 Тылгын ыйытыам, — диэн
Тырыта тыытаары,
Часкыйбахтыы турда.
Аҥаардам бухатыыр
Куттанан куоһуйда,
Кистэнэн кирийдэ,

- 438 -