Page 188 - Элэс Боотур Бүөтүр Оҕотоойоп

172 П. В. ОГОТОЕВ

Кустук оноҕос курдук куһууран
5950 Төбөтүн оройун туһаайбытынан
Түргэнтэн-түргэнник
Түһэн иһэр эбит.
Төбөтүгэр тиийэрэ
Түөрт эрэ илии хаалтын кэннэ
Элэс Боотур
Этэ тардан
Иҥнэс гынан,
Сиирэ көтөн
Сиргэ ньимис гынан хаалла.
5960 Ситэ өйдөнө илигинэ
Сииргэ сорунан,
Аһарыан иннинэ
Атаҕын икки ардынан
Куһуурда-куугунаабытынан
Күөрэйэн тахсан иһэр эбит.
Тоҕус саһаан сиргэ
Туора ойон биэрэн,
Тугун да таппакка
Тобулу ытан,
5970 Ыастаах кустук оноҕос курдук
Ыйылыы көтөн,
Өһөх Хара халлаан
Үрүт өттүн диэки
Өрө кыырайа турда.
Төттөрү түһүүтүгэр
Тус иннигэр кэлэн
Тоҥ тимир курдук
Туруору саайылла түстэ да,
Үөс Тардар обургу
5980 Илэ бэйэтинэн буола охсоот,
Элэс Боотуру,
Харсаары гыммыт атыыр оҕус курдук
Хааннааҕынан хаһылыччы көрөн туран,
Күлүү-элэк гынан,
Куула тыа
Куруҥ маһа
Кумаланыар диэри
Күлэн күллэрэстии,