Page 107 - Алаатыыр Ала Туйгун. 2-с үйэтэ

Эһэр буолара,
Аартыгар түбэспити
Аһылык гынан
Адьаһын мэлитэрэ.
Арай бу
Алаатыыр Ала Туйгуну
4200 Кыайан сиэминэ,
Ат-биэ курдук айаспыта,
Аллараа, үөһээ дойдуларга
Аат сурах тарҕанан
Ааппын алдьатыаҕа диэн,
Алыс абарда,
Олус уоҕурда.
Часкыйа-часкыйа эккирээтэ,
Биирдэ көстүүтүгэр
Туох да өртүттэн
4210 Торҕо биилээх
Тоҕо охсуо суох
Суорба таас
Хара килэдьи киһи буолан,
Эккирээн лигийбэхтээтэ.
Биирдэ көрдөххө,
Ыйдаҥатааҕы тиит
Күлүгүн курдук
Күлүк дьэргэлгэн киһи буолан,
Бэрис-күлүс
4220 Ырас-көдөс
Ньылыс-мэлис гына турда.
Биирдэ көстүүтүгэр
Арсыын тыҥырахтаах,
Аһыылаах тиистээх,
Былас тыллаах
Ураһа дьиэ саҕа
Уот сырҕан эһэ буолан
Часкыйа-часкыйа кыланна.
Биирдэ көстүүтүгэр
4230 Аҕыс сарадах кутуруктаах,
Тимир дапсыыр тыллаах,
Тоҕус бүгүйэх систээх,
Илбистээх дьааттаах
Эриэн үөн буолан,
Иэнинэн таһыйбахтаата,
Урбачыс гынан ылыытыгар

- 103 -