Page 121 - Алаатыыр Ала Туйгун. 2-с үйэтэ

Элик үтүөлэрэ
Биһиги бэйэлээхтэр
Эрдэ тиийэммит,
Илии-атах
Ис-үөс тирбэҕэ былдьаһан,
4800 Тииһиниэх этибит диэннэр,
Идэмэр соллоҥ
Эһир хара бухатыырдара
Илбискэ туттар сэптэрин
Илин-кэлин түсүһэн,
Эккирэтиһэн кэлэннэр,
Илбистээх охсуһуу буурҕатыгар
Ибили эриттэрэн,
Иннилэри-кэннилэрин билбэккэ,
Эттэрэ-сииннэрэ
4810 Эстиэрдиэри
Ибили сынньыллан,
Эргийбэккэ мэлийэн испиттэр.
Сордоох-соболоҥноох
Соҕуруу суккуллар
Добун маҥан халлаан
Тумарыктаах улаҕатыттан,
Чупчурҕан хара биистэриттэн
Дохсун бөҕөлөрө,
Дуолан бухатыырдара
4820 Туох-ханнык иннинэ
Тутуу былдьаһан,
Чугас киирсэн,
Оннук бэйэлээх
Улахан бухатыыр
Охторун кытта
Оһоҕос-иһэҕэс тардыһан,
Уоп-чаап гыныа этибит диэннэр,
Урут-хойут түсүһэн,
Олбук-солбук
4830 Омуннанан кэлэннэр,
Олус чугаһаан хааланнар,
Охсуһуу буурҕатыгар түбэһэн,
Охтон сөһүргэстээн,
Унуохтуун-иҥиэхтиин кумаланан,
Урусхал буолан,
Ордон төннүбэккэ,
Олох сүтэ турбуттар.

- 117 -