Page 156 - Алаатыыр Ала Туйгун. 2-с үйэтэ

Оннооҕор ордук
Уйадыйбат уҥуохтаах,
Ууллубат эттээх,
Уохтаах күүстээх,
Улахан бухатыыр киһи
6220 Урааҥхай сахаттан
Уһуллан төрөөбүт эбит буоллаххына,
Күн-айыы аймахтарын
Көстүбэт бөҕө
Күмчүлүүрэ уурайыаҕа,
Күндэлэс маҕан
Күннэрэ тахсыаҕа,
Күөрэгэйдэрэ ыллыаҕа,
Көҥүл-босхо көччүйүөҕэ,
Өрөгөйгүт үрдээтин,
6230 Саргыгыт салалыннын,
Уруй-туску буоллун,
Уруй-айхал буоллун! — диэтэ.
Бу туохха да
Кыаттарбатах өлбөт үөстээх
Абааһы бухатыыра
Уус кыһатыгар киирэн
Буһан өлбүтүнэн
Бу күн анныгар
Барыны барытын кыайааччы
6240 Уус кыһата буолуо диэн,
Кырдьаҕас олоҥхоһуттар
Олоҥхолуур буолаллара.
Алаатыыр Ала Туйгун
Атын үрдүгэр
Өксөкү кыыл курдук
Дап гына олоро түстэ.
Айыы дайдытын диэки
Айаннатан дьабыдытан,
Күн сирин диэки
6250 Көмөлгөннөхтүк тэбиннэрдэ,
Көҥүтэ үктэттэ,
Хайдыы кэҥис курдук
Хайыта тэптэрэн,
Тостор уораан саҕаны
Тоҕута тэбиннэрэн,
Добун силлиэ доҕордонон,
Аан холорук аргыстанан,
150
-