Page 17 - Алаатыыр Ала Туйгун. 2-с үйэтэ

Атаһыам, — диэтэ.
330 Инньэ диирин кытта
Хайыһардаах киһи
Сөрүү хайыста,
Сөтөрүччү тутунна,
Кимиэллээх соҕустук
Киҥир-хаҥыр
Ырыа ыллыы истэ:
— Алаатыгар, алаатыгар, оҕолоор!
Көнө да тылтан
Кыйахалаабыт тыс курдук
340 Кыыһырымтаҕай күтүр
Кынчайан иһэр эбит дуу?!
Киэбирбиккин кэтэҕиҥ уйбатах
Кэбэлкэйэ эбиккин,
Киэҥ дойду
Кэтит эйгэтиттэн
Кэргэн кэпсэтээри,
Киэмсийэн-киэргэнэн,
Киэбирэн иһэбин диэн,
Кэпсээбитиҥ буоллар
350 Кырдьыктаныах этим.
Ол иһин даҕаны
Уруккуттан үлэспит
Ойоххор тиийээри,
Олус ордуос эбиккин.
Аартыкпар тоһуйан,
Арахпакка батыһан,
Аргыстаһан тиийэн,
Асаһынньаҥ буолан,
Арбайан-сарбайан,
360 Алыс мэһэйдэһиэ диэҥҥин,
Абааһы көрдүҥ быһыылаах.
Аналлаах кэргэммин
Аралдьытыа диэҥҥин,
Алыс көҥөннүҥ буолуо,
Батыһан тиийэн
Баараҕай ыалым
Мааны кыыстара буолбут
Маҥан ойохпор ымсыыран,
Былдьасыһыа диэҥҥин,
370 Бачча буолбут
Баранааххын дуу?!

- 13