Page 21 - Алаатыыр Ала Туйгун. 2-с үйэтэ

Эрдэҕэс улар
Түөһүн түүтүн курдук
Эбир-дьаҕыл буолан,
Эбиэрийэн көстөр
Эбиэн таас хайалар диэки
Хара килэдьи хайыһарын
Хайыр таас дойдуну
Кыраһа хаар курдук
Кыыс бэрбээкэйинэн
Хайа тыыран,
Хаһыырдан түһэн,
Бара турда.
Хайыһарын кэнниттэн
Халлааҥна харбаһар
Хара күдэрик оргуйан хаалла.
Алаатыыр Ала Туйгун
Айаннаабытын курдук
Айанныы турда.
Барар сирэ
Барадаҕа биллибэтэ,
Тиийэр сирэ
Сиксигэ көстүбэтэ,
Иитэ-саҕата биллибэт
Элэй-мэлэй
Эрбэдэһин дуоһун
Иччитэх куйаар дойду
Иччитэх өртүгэр,
Мугура биллибэт
Муус Кудулу байҕал
Улаҕа өртүгэр,
Сиксигэ биллибэт
Сэттэ үөстээх
Силлиэ буурҕа тыыннаах
Дьэбин араҕас байҕал
Чиэрэс өртүгэр
Анысхааннаах аан халарык
Ала буурҕа тыыннаах
Адаар муус
Аалсыһар арҕастаах
АҕыС үөстээх
Аас мэҥилгэн байҕал тардыытыгар
Сэттэ биттэхтээх
Сир ийэ