Page 179 - Алаатыыр Ала Туйгун. 2-с үйэтэ

Хапсаҕайдаһар идэлээх
7120 Халбархай тустааччы
Хатан бөҕөс уолаттар
Хапсаҕайынан киирсэн,
Хапсыһан ылан,
Хады-куду куустуһан,
Хардары-таары бырахсан,
Хаалдьыктарын тэлгэнэн,
Хам-кум баттаһан,
Харса суох түсүһэн,
Тустан көрдөрдүлэр.
7130 Сото-хары былдьаһар
Дьулурҕа бөҕөс уолаттар
Туппалаһан киирсэн,
Туруорута куустуһан,
Туора-маары бырахсан,
Тобуктаһан туруйалаһан,
Сулбу-халбы баттаһан,
Сылбаргы тустууну
Манна туһуннулар.
Дьэргэстэй ырыаһыт
7140 Ыллаан дьиэрэһиттэ,
Дьүөрэҥ үҥкүүһүт
Үҥкүлээн дуораһытта.
Аҕамсыйа барбыт дьоннор
Акымалларыттан ылсан,
Эмэн дьахталлар
Илиилэриттэн сиэттиһэн,
Эйэҥ-сэйэҥ
Ыллаһан бардылар:
— Дьиэ буо, дьиэ буо!
7150 Саргыбыт салалынна,
Өрөгөйбүт үрдээтэ.
Дьөһөгөй айыыттан
Сиэттиһэн-ситимнэһэн түһэр
Сиэллээх нэлбиргэлээх
Сиэги маҕан аартык
Сэлэлиннэ, сэгэрдээр!
Ахтар-саныыр
Айыыһыт хатын аартыга
Аҕыс тоҕойдоох
7160 Айыы кэрдии маҕан аартык
Аһылынна, атастаар!
- 171 -