Page 185 - Алаатыыр Ала Туйгун. 2-с үйэтэ

Иэримэ дьиэҕитин иччилээҥ,
Аан дайдыгытын араҥаччылааҥ,
Аспыт чэчирбит хагдарыйбатын,
7380 Халыҥ халҕаммыт сэгэйбэтин,
Суон суллүгэспит төлөрүйбэтин,
Тааҕылаах убаһабыт тахсыбатын,
Толугурдаах торбуйахпыт туораабатын,
Өрөгөй көҕүллээхпит үөрдээтин,
Атырдьах туйахтаахпыт арыаллаатын,
Ача күөхпүт аҥаарыйдын,
Торҕо күөхпүт
Торолуйа турдун,
Уйгу быйаҥмыт уостубатын,
7390 Оттубут уоппут умуллубатын,
Уулуур ойбоммут уолбатын,
Ойуулаах оппут-маспыт хагдарыйбатын,
Төрүүр төрүөхпүт
Төлөһүйэ турдун,
Быралыйар-куралыйар
Бырастыыкай буоллун! — диэтэ да,
Атын арҕаа халлаан
Улаҕатын диэки
Салайа тардан кэбистэ.
7400 Сындыыс чаҕылҕан курдук кымньыылаата,
Кустук уот курдук курбуулаата,
Омуннаахтык уостуганнаата,
Тэтимнээхтик тэһииннээтэ,
Чиҥник тибилийдэ,
Чучурааннык тутта,
Халыаннык хамсатта,
Аллаахтык айаннатта.
Аҕыс иилээх-саҕалаах
Айгыр-силик
7410 Алыгыр-налыгыр
Аан ийэ дайдытын
Арҕаа мындаатынан
Аас маҕан
Атыыр сылгы
Ардайдаах сиэлин
Адаарыччы туппут курдук,
Аарыма хара тыатын
Айаан үрэх курдук
Арыйа көтөн,
- 177 -