Page 250 - Алаатыыр Ала Туйгун. 2-с үйэтэ

10170 Алдьархайдаах албастаах
Аартыгын арыйан,
Куудьуйар кубулҕаттаах
Суолун тобулан,
Тиийиэхпит эбитэ буолуо.
Ол аптаах моҕой үөн
Ханна буолуой диэтэххинэ,
Убайым Уот Субурҕа бухатыыр
Харахтаахха көрдөрбөккө,
Кулгаахтаахха иһитиннэрбэккэ,
10180 Муруннаахха сытырҕалаппакка,
Мэйиилээххэ биллэрбэккэ,
Бэйэтигэр илдьэ сылдьар
Идэлээх этэ.
Ол иһин утуйдаҕына даҕаны
Уҥа кулгааҕын иһигэр
Уктан кэбиһээччи,
Ол курдук кини
Уҥа кулгааҕын иһигэр
Уктан баран, утуйа сытара буолуо
10190 Нойон киһиэ, — диэтэҕэ
Абааһы кыыһа.
Онуоха Алаатыыр Ала Туйгун:
— Бу аллараа дойду
Ааттаах кыыс оҕото
Ааһар албастаах,
Куотар кубулҕаттаах буолуоҥ.
Ол аптаах моҕой үөнү
Ылан биэрэриҥ буоллар,
Кырдьыга даҕаны,
10200 Хорсун кыыс оҕону
Ойох ылбыппын диэн,
Үөрэн-көтөн,
Уруйдуох-айхаллыах этим, — диэтэ.
Онуоха абааһы кыыһа
Татынньахтыы түстэ,
Часкыйбахтыы турда:
— Туһааннаах доҕорум,
Тойон эрим,
Соруйбут соруккун
10210 Толорботгоох даҕаны
Буолуом этэ дуо?
Ол гынан баран
- 242 -