Page 254 - Алаатыыр Ала Туйгун. 2-с үйэтэ
P. 254
Төбөлөрүн оройунан
Дьөлө хойуостанан
Тиэрэ таһылла түстүлэр.
Ол гынан баран
Өрүкүйэр уһуутуур
Өһөх-балай
Үөлэһин үүтүнэн
Өҥөс гынан көрбүттэрэ —
10350 Алаҕар харахтаах
Анааран көрбөтөх
Аһыылаах тиистээх,
Адаар хара тыҥырахтаах
Абааһы адьыррта
Айаҕын атыаҕынан аппыт,
Тылын былас таһаарбыт,
Балаҕанын ортотугар
Балтаччы олорбут,
Бадьаччы тэбиммит,
10360 Курунньуктаах сүүһүнэн
Оһоҕун хоротуттан
Умсары тирэммит,
Таҥнары тайахтаммыт*,
Олорбутунан утуктаан,
Уһун айантан
Улаханнык сылайан,
Умсары буугунаан,
Утуйан хаалбыт эбит.
Айаҕа диэтэх
10370 Аппа хайдыбытын курдук
Адьас ыытынан
Аллараа тэллэйэн
Аллаччы аппыт,
Сымыһаҕа диэтэх
Сыыр быстыбытын курдук
Сылластан түспүт,
Сыҥ ойуур суулбутун курдук
Тимир сигиди баттаҕа
Балаҕанын үрдүк
10380 Барамньы тииһин курдук
Батарыта көтөн тахсыбыт,
Муннун уута сүүрэн
Буурҕа-холорук курдук
Күрүлэччи тыынан,
- 246 -
