Page 262 - Алаатыыр Ала Туйгун. 2-с үйэтэ

Доҕоччугуом, оҕотоо!
Утарыта куустуһан туран,
Үөһээ-аллараа уоспутуттан
Үстүү хамыйах хаанна
10690 Уураһа охсон,
Ылыах эрэ,
Эрэллээх доҕоруом, — диэтэ.
Инньэ диирин кытта
Абааһы кыыһа
Алларастыы түстэ,
Тоҕуста чохчойтолоото,
Сэттэтэ тиэрийбэхтээтэ,
Тиэрэ мэтэрийдэ,
Илиитин быластаабытынан,
10700 Уоһун орбоппутунан
Уун-утары
Сапта түһэн эрдэҕинэ,
Алаатыыр Ала Туйгун
Абааһы кыыһын
Атаҕынан таҥнары
Тутан ылан,
Аптаах моҕойдору
Өлөр өлүү
Сымала уотугар часкыппытынан
10710 Төбөтүн оройунан
Дьөлө бырахта.
Кур тэтиҥ
Сэбирдэҕин курдук
Күөх уот
Күлүм гынан хаалла:
— Хор эрэ,
Санаабыт санаа
Табылынна бадахтаах.
Аллараа дайды
10720 Алдьархайдаах адьырҕата
Уот Субурҕа бухатыыр
Обургу дьаалы
Куотар кубулҕатын,
Ааһар албаһын
Сарбыйдым быһыылаах.
Адьарай атамаанын
Көстүбэт күтүрдээҕин
Сиир сиэхсити,
- 254 -