Page 275 - Алаатыыр Ала Туйгун. 2-с үйэтэ

Самантан төннөн түһэммин,
Аллараа дайды алдьархайдаах
Адьырҕата буолбут
Уот Субурҕа бухатыыры кытта
Охсуһан көруөх этим.
11250 Ол улуу күтүр
Уора тутар уомардаах,
Кистии тутар кэмэлдьилээх,
Саһыара тутар санаалаах,
Өйдөппөккө тутар өйдөөх,
Биллэрбэккэ тутар мэйиилээх,
Хорҕото тутар кубулҕаттаах,
Аһара тутар албастаах,
Көрдөрөн туруоран,
Көрө мэлдьэхтээх,
11260 Туттаран туран,
Тута балыырдаах,
Суостаах-суодаллаах,
Көстүбэт бөҕө
Күтүрдээҕэ буолуо.
Ол абааһы адьырҕата
Баарын тухары
Орто аан ийэ дойдуга
Оһолу-төрүөтү
Оҥоро туруо,
11270 Алдьархайы-садыамы
Аҕала туруо,
Өлүүнү-сүтүүнү
Үксэтэ туруо.
Онон кинини эрэ
Бүдүрүппүт киһи
Орто дойду
Олоҕо тупсуо этэ.
Айыы хаан аймахтара
Айхаллыа-уруйдуо этилэр,
11280 Күн өркөн уустара
Көстүбэт бөҕө
Күөмчүлээн туран,
Күөстэнэн аһыырыттан
Куттала суох
Көҥүл-босхо
Көччүйүө этилэр, — диэтэ.
Икки тойон ыҥырыатын

- 267 -