Page 320 - Алаатыыр Ала Туйгун. 2-с үйэтэ

13180 Сир тииҥнэрэ диэн
Кулгаахтыын чөрөйөн,
Кутуруктуун лөглөйөн,
Түүлүүн-өҥнүүн кылбааран,
Сирэйдиин-харахтыын
Дьэрэлийэн-дьэргэйэн,
Сиэдэрэй да
Үтүө кыыл эбит.
Дьиэҕэ-уокка тиийэн,
Кэргэҥҥэ-оҕоҕо
13190 Кэһиилэнэн киирдэххэ,
Кэрэхсэбиллээх да
Үтүө булду
Бултаатым ээ диэн,
Тобугун үрдүгэр ууран,
Туора-маары сотго,
Өрө-таҥнары тутан,
Үөрэ-көтө,
Көрө-истэ
Олорбута эбитэ үһү.
13200 Бу олордоҕуна,
Саталаах тыал
Сабыта биэрдэ,
Кураайы тыал
Куугунуу түстэ,
Сытыы чысхаан
Быһыта кымньыылаата,
Үөл тыа төбөтө
Үмүрүччү тардан
Өҕүллэн түстэ,
13210 Хардан' хара тыа
Хатан дьылхан тиитэ
Хачыгырыы хамсаата,
Туруук хайа төбөлөрө
Туманынан оргуйан
Тумарыктыйан барда.
Күкүр хайалар
Күдэрик тиийэн күкүнэһэн
Күлүгүрэ түстүлэр.
Чай таас
13220 Лаһыгырыы саалынна,
Суорба таас
Лоһугуруу суулунна,
312 -