Page 327 - Алаатыыр Ала Туйгун. 2-с үйэтэ

Дьүкээбил уотунуу
Долгулдьуйа суһумнуур,
Өрө туттахха
Күн уотунуу
Күлүмүрдүүр өҥнөөх,
Таҥнары туттахха
Чаҕылҕан уотунуу
Сандаарар таманнаах,
Сындыыс чаҕылҕан курдук
13490 Кылабыччыйан көстөр
Кырыктаах биилээх,
Уот тууспан курдук
Оботтоох-чупчурҕаннаах,
Омуннаах-төлөннөөх,
Оһоллоох-уһуктаах
Талбаатаан көрдөххө,
Сата курдук часкыйар
Таллан маҕан тайыытын
Утары туппутунан,
13500 Күрэ тааһы
Көҥүтэ үктүөн,
Дэриэспэ тааһы
Дэлбэритэ тэбинэн,
Сүллээх этиҥ курдук
Сүүрэн лүһүгүрээн кэлэн,
Түспүтүнэн барда.
Онуоха буоллаҕына
Алаатыыр Ала Туйгун
Аһаран биэрдэ.
13510 Абара санаата,
Хапсаҕай үлүгэрдик
Хатан тайыыны
Харытын таһынан
Туора садьыйан кэбистэ,
Тоҥ болгуо курдук
Томороон модьу тарбаҕынан
Саҕынньаҕын саҕатыттан
Саба харбаан ылан,
Сабырҕахтаабытынан барда.
13520 Дагда таба тириитэ
Саҕынньах буолуо диэбитэ,
Чакыыр таас курдук
Муос килэдьи куйах буолла.
319
-