Page 339 - Алаатыыр Ала Туйгун. 2-с үйэтэ

Үөл отун-маһын
Үлтү сынньан,
Үрүҥ күдэн курдук
14000 Үрдүк халлаан өрөһөтүгэр
Өрө үрэн,
Өрүкүтэн таһаарда
Кырыстары-буордары
Кылбаччы мэлитэн,
Кытыылыыр сылгы саҕа
Кыһыл сымара тааһынан
Кыһыгыраччы тибэн,
Кыскыйа турда.
Күнү-ыйы бүөлүүр
14010 Күкүр хайалар төбөлөрүн
Күрэ таастара
Көҥүтэ сынньыллан,
Үлтү ытыллан,
Күдэрик буурҕанан оргуйан,
Күҥкүнэһэ турдулар.
Туруук хайалар дьулаҕайдара
Дохсун буурҕаттан
Торҕон бөрө курдук
Улуйан онолустулар.
14020 Тараҕай таастар
Саталаах тыалтан
Сырҕан эһэ курдук
Часкыйа хаһыыра турдулар.
Онтон ыла бу дойду
Ото-маһа отох,
Сирэ-дойдута лээби,
Килэмэн мэлискэх,
Киэҥ эйгэлээх
Туманнаах буурҕалаах
14030 Дьулаахыр халтан
Дойду буолбут эбит.
Бу сириэдийэн үөскээбит
Сир ийэ хотугу өртүн
Хоточчу тэпсибитгэрэ,
Иҥнэри үктүөбүтгэрэ —
Иитэ саҕата биллибэт
Элэй-мэлэй
Эрбэдэһин дуоһун дойду буолан,
Иҥнэри тардан түспүт эбит.
- 331 -