Page 371 - Алаатыыр Ала Туйгун. 2-с үйэтэ

Ол кимий диэтэххинэ —
Одун маҕан халлаан
Уу дьулайыгар
Олохсуйан үөскээбит
Улуутуйар Улуу Тойон оҕонньор
Уоҕан уола
Бүтүннүү уобар,
15380 Бөрөлүү ыйыстар
Куоһара хара
Кудулу Моҕой диэн
Мунура көстүбэтэх,
Баҕата хамматах,
Маҥалайа туолбатах,
Буулаҕа бухатыыры
Булан тоһуйдум.
Ону кытта киирэҥҥин
Күөн көрсүһэн,
15390 Күрэс былдьаһан,
Тустан охсуһан,
Туруулаһан көр эрэ,
Нойон киһиэ!
Тардыалаһарга хатан тарбахтаах,
Тэбиэлэһэргэ чиҥ тиҥилэхтээх,
Тутуһуохха дьороҕой илиилээх,
Охсуһуохха сөҥ сутуруктаах,
Уола хаан буолуо.
Ол буулаҕа бухатыыры
15400 Боҕутуннарарыҥ буоллар,
Бүтүн бэйэтин
Мүһэтин-силгэтин араарбакка,
Тараҕай таас
Булгунньаҕым үрдүгэр
Дабдаччы тиирэн,
Көҥдөй көхсүн
Көҥкөччү туруоран,
Аллараа бөҕөлөр
Адалыһан таҕыстахтарына,
15410 Үөһээ бөҕөлөр
Үмүөрүһэн түстэхтэринэ,
Орто дойду удурҕаччылара
Тоҕуоруһан кэллэхтэринэ,
Киэн тутган
Кэпсээн гыныам этэ,
- 363 -