Page 395 - Алаатыыр Ала Туйгун. 2-с үйэтэ

Уруй-туску буоллун,
Уруй-айхал буоллун! — диэннэр,
Айыы хаан аймахтара,
Күн өркөн уустара
Бу дойду
16410 Көрүлүүр көмөҕөйүгэр,
Көй киинигэр
Көмүс үргүнньэҕэр
Күөх торҕотугар
Ытык ыһыаҕы ыһаары,
Түөлбэ түһүлгэни тэрийээри,
Күө-дьаа кэпсэтэ,
Көбө-саба хаамса,
Күлэ-оонньуу өрөгөйдүү,
Көрүлүү-нарылыы хаалтара үһү.
16420 Алаатыыр Ала Туйгун
Арарс сиэр атын үрдүгэр
Өксөкү кыыл курдук
Дап гына олоро түстэ.
Бу киэҥ Тумарыкы Эбэ хотун
Дьогдьойор саалыттан,
Туйгутуур уорҕатыттан
Тураҥ буорун
Логлу тэптэрэн,
Кыппай күөх кырсын
16430 Быһыта тирэннэрэн,
Сиэллэрэн -тэптэрэн,
Уурдаран-оҕустаран,
Айаннатан-астаран,
Дьабыдьытан-дьалкытан,
Сарт кыылым
Сарбынньахтаах кутуругун
Сараадыччы туппут курдук
Чаалай күөх сэбирдэхтээх,
Нуолур күөх мутукчалаах,
16440 Лоһуор чопчу туораахтаах,
Дьогдьоон хара тыатыгар
Өрө дьабыдьытан тахсан
Бара турда.
Араҕас сиэр ата барахсан
Аллаахтык айаннаата,
Чучурааннык тутунна,
Халыаннык хамсанна,

- 387 -