Page 52 - Алаатыыр Ала Туйгун. 2-с үйэтэ

Тоҕута үктүөбүт,
Сэтии мыаннырыгын
Сиритэ тэпсибит
Симэхсин эмээхсин
Тиҥкичэхтээн киирэн иһэр эбит.
Симэһиннээх сиикэй эти
Тиэрэ быһан кээспит курдук
1840 Сирэй омоонноох,
Хааннаах хаппар куҥу
Хайыта баттаабыт курдук
Хаһыллыбыт харахтаах,
Сүлүһүннээх дьүлэй куҥу
Дьөлүтэ быспыт курдук
Сөтөрүйбүт дьүһуннээх,
Былчархайдаах бытта сыатын
Быһыта соппут курдук
Былластыгас уостаах,
1850 Тымырдаахтыҥаны
Тырыта быһан кэбиспит курдук
Сылластыгас сымыһахтаах,
Дьааҕырбыт туйаҕы
Саба сыһыарбыт курдук
Дьанталлыбыт таныылардаах,
Эргэтээҕи дулҕа
Сэтиэнэҕин курдук
Эрбэҕэйдэммит баттахтаах,
Эмээхсин бөҕө
1860 Этэрбэһин быата сөллөн,
Икки кулгаах тааһын
Ибили таһыйбыт
Олооччутун туома
Онньоҕунан үктэнэн,
Оһунан тэпсиллэн,
Уллуҥа өрө чолойон тахсан,
Уоһун-тииһин
Тоҕута кырбаабыт.
Ол курдук айаннаан,
1870 Сыһыыны быһа сыылаҥхайдаан,
Хонууну быһа хобуохайдаан,
Толоону быһа сурдурҕайдаан,
Түгэҕэ биллибэт
Чөҥөрө чүөмпэтигэр киирэн,
Ол-бу диэки

- 4 8 -