Page 57 - Алаатыыр Ала Туйгун. 2-с үйэтэ

Ыҥыра охсон таһаар, — диэтэ.
Тааҕылаах убаһа
Илин тыһа үтүлүктээх,
2050 Кэлин тыһа этэрбэстээх,
Баттаҕа бэргэһэлээх,
Кулгааҕа намыскаллаах,
Кутуруга моойторуктаах,
Тулума курдаах,
Уорҕата сонноох,
Өрөҕөтө ыстааннаах
Сылгыһыт сыыдам быһый
Аас-тотоҥхой,
Алын-халбархай,
2060 Хаадыат хапсаҕай,
Хара халыаҥхай,
Чобуо чолбонуку
Сорук Боллур уол обургу
Урбаччыйа түстэ.
Олооччутун анньынна,
Орто таҥаһын тардынна,
Онон-манан оҥоһунна,
Тиэрэ-маары тимэхтэннэ,
Суол ааныгар
2070 Толугур гынна,
Таһырдьа ыстанан
Талыгыр гынна,
Тэлгэһэ ортотугар
Тилир гынна,
Сэттэ тиэргэн
Чиэрэс өртүгэр,
Аҕыс дал анараа өртүгэр
Тааҕылаах убаһа атын
Сэттэтэ чэччилээтэ,
2080 Түөртэ төгүрүйдэ,
Тутан ылла.
Сөтөччү сүрүөлээтэ,
Кынньаччы кычымнаата,
Наҥначчы чаппараахтаата,
Болточчу ботолоото,
Ыначчы ыҥыырдаата,
Хопчоччу холумнаата,
Дэдэччи дьиримнээтэ,
Чоноччу сулардаата,

53 -