Page 287 - Неизвестное название

Аһара тутар адьынаттаах,
Ааһар бөҕө албастаах
Аҥардам абааһы
Адьарай уолун киэнэ
Аартыга даҕаны
Араскааттаах эбит.
Суола даҕаны
Тосхоллоох буолан,
Сирэ-дойдута даҕаны
11990 Силлиэлээх-буурҕалаах
Буолар эбит.
Бу тимир иһирик ойууру
Тобулу солоон тахсаары
Сорунан турабын,
Үһүө буолан көмөлөөн,
Үлтү сынньан,
Уҥуордаан-чиэрэстээн тахсаммыт,
Ол баҕайы уораҕайдаах ордуутун
Адалыйар арҕаҕын буларбыт буоллар,
12000 Буор сирэйи,
Бурҕалдьы сотону,
Муннун үүттээн
Боҕутуннарыах этибит.
Кэлиҥ, көмөлөһүҥ, нохолоор! — диэтэ.
Инньэ диирин кытта
Тустуулаах Дьуруо Бөҕө
Охсуһуулаах Оҕо Удаарынныын
Аттарыттан ыстанан түстүлэр:
— Аллаах аттарбыт,
12010 Чучураан соноҕосторбут,
Көтөр кынаттарбыт,
Көмүс табаларбыт
Бырдахтаах бырааҥҥытыгар
Мэччийэн дьаарбайыҥ,
Күөх хочолоргутугар күүлэйдээҥ,
Ыҥырдарбыт эрэ
Ыраах да буолларгыт
Сыыдамнык чугаһаарыҥ,
Үрдүк да буолларгыт
12020 Түргэнник түһээриҥ,
Дириҥ да буолларгыт
Тиэтэллик дагдайаарыҥ! —
Диэн бараннар,
284 -