Page 298 - Неизвестное название

Араҕас сиэр аттаах
Алаатыыр Ала Туйгун диэн
Атаска холуйбатах
Албаннаахай атаһым этэ,
Доҕорго холуйбатах
Дьоһуннаах үтүө доҕорум этэ.
12460 Умса түһээри гыннахпына,
Сүүспүтүттэн өйөһүөх буолан,
Тиэрэ түһээри гыннахпына,
Кэтэхпититтэн өйөһүөхпүт диэн,
Үйэлээх-үйэ тухары
Биир күөлү икки өртүттэн
Илимнээн-куйуурдаан,
Биир тыаны икки өртүттэн
Туһахтыах-сохсолуох,
Тугу буларбытын
12470 Хардарыта атастаһан,
Эт эйэлээхтик,
Ыкса ыаллыы,
Чугас доҕордуу,
Уруулуу-аймахтыы,
Олоруохпут дэсиһэн,
Кэс тылы этиспиппит,
Кэриэс тылы кэпсэппиппит.
Кэнэҕэски үйэлэр тухары
Көстүбэт бөҕөлөртөн көмүскэһэр,
12480 Адьарай бөҕөлөртөн
Араҥаччылыыр буоллуннар диэн,
Алгыс алҕаһан,
Аар-дархан
Андаҕары андаҕаһан,
Арахсыбыппыт баара.
Ол оҕото улаатан,
Төрүөҕэ төлөһүйэн,
Кэнчээри ыччата
Кэлэн турар буоллаххына,
12490 Көрдьөспүт көрдьөһүүгүн
Төттөрү этэн,
Түҥнэри хайыһар буоллахпына,
Кэнэҕэски кэнчээрилэргэ
Кэмсилгэннээх буолуо,
Хойукку дьоннорго
Хомолтолоох буолуо.

- 295 -