Page 299 - Неизвестное название

Сүөн дойдуга сүөргүлээх,
Тэгил дойдуга сэмэлээх,
Суҥхалаах буолуо, нохоо!
12500 Анаан кыһаннахпына,
Ахсым да алдьархайтан
Абырыыр атас гиэнэ
Албаннааҕа буолуом,
Соруйан соруннахпына,
Дохсун да өлүүттэн
Өрүһүйэн ылар
Доҕор гиэнэ
Дьоһуннааҕа буолуом.
Суолгутун тобулан,
12510 Аартыккытын арыйан,
Тиийиэхпит диэбит сиргитигэр
Сирдээн да көрүүм эрэ,
Буойака! — диэтэ.
Ол гынан баран
Төһөттөн-эмэттэн
Сүр кырыа буолбут
Сиппэхтээх-сэмнэхтээх,
Көтөҕөлөөх-лабыкталаах,
Күкүр муус буолбут
12520 Көхсүн көннөрдө.
Күүстээх буурҕа курдук
Көҥү илгистэн кэбистэ,
Кырыалаах дьаҥхатын
Кыкыр муус кыаһаанын
Кыыдаан сата курдук
Дьигиһис гынан кэбистэ.
Тимир иһирик ойууру
Сэтиэнэх от курдук
Силэйэ тэбэн
12530 Өлөҥ от курдук
Үлтү силэйэн,
Тоҥ кулуһун курдук
Тоҕу көтөн,
Тус хоту диэки
Добун силлиэ курдук
Өрүкүс гынан хаалла.
Били гынарын кытта
Үөрэн-көтөн
Үмүөрүһэ түстүлэр.
- 296 -