Page 301 - Неизвестное название

Тимир иһирик ойуурдарын
Уҥуордаан-чиэрэстээн,
Уһуутатан тахсыбыттар эбит.
Хайыһардарын суола
Хараҥа хапчааннары
Хайыр таастары
Хаар хомурах курдук
12590 Хайыта тыыран
Хаһыырдан барда,
Түҥкэтэх түһээннэринэн
Түҥкэл-таҥхал
Түһэн барда,
Туой таастары
Дабайталаан таҕыста,
Турар туруук хайалары
Туруорута чиэрэстээн
Дьулуруйан субуллан истэ.
12600 Оһуу-тоһуу төбөлөөх
Очуос таастары уҥуордаан,
Сыҥ ойуурдары сыыйталаан,
Сыбар тыалары чиэрэстээн,
Сыыйыллан-тыргыллан истэ,
Ыраах сири ыҥыччылаан,
Дьоһун сири дьолкуйан,
Дьаныһан туран
Сайыалаһан истилэр.
Күкүр таас күлүгэр,
12610 Туруук хайа тоҕойугар,
Аҕыс аабылаан айаҕар,
Сэттэ симилэх сиигэр,
Түбэ тыа төрдүгэр,
Куруҥ ойуур хонноҕор,
Курай уот
Куугуначчы оттуллубут,
Сэмнэх сэп уһуллубут,
Сэдир дэпсэ тэлгэммит,
Өлгөм үтэһэ үөлүллүбүт.
12620 Аартыктарын айаҕар
Ардьамаан-Дьардьамаан бухатыыр
Түөрт үтэһэҕэ
Түөрт буур тайаҕы үөлбүт,
Күөһэ-аһа буспут,
Көһүтэн олорор эбит.
- 298 -