Page 30 - Неизвестное название

930 Адалыйан тахсар,
Орто дойдулар
Тоҕуоруһан мустар,
Чуораадыйар - ахтал ыйар
Суолларын төрдүгэр.
Сириэдийэн уһаммыт
Кыстыгын тыаһа
Кыырай халлааҥҥа кыырайбыт,
Балтатын тыаһа
Байҕал унуор чаҥкынаабыт,
940 Күөртүн тыаһа
Күдэн дойдута күүгүнээбит,
Оһоҕун кыыма
Одун халлааҥҥа уһуутаабыт.
Улуу Суодалы Хаан ууска
Уһаннара бардым,
Уол оҕобор*
Тустуулаах-туруулаһыылаах
Дьуруо Бөҕөҕө
Тутгар сэп,
950 Кэтэр куйах,
Оҥотторон аҕалыам.
Эргиллэн кэлиэхпэр диэри
Иэримэ дьиэбитин иччилээн,
Аан алаһаҕытын араҥаччылаан,
Үөрэ-көтө
Үмүөрүтэн олорооруҥ! — диэтэ да,
Атын тэһиинин
Арҕаалыы-хотугу
Муннук туһунан
960 Туһулуу тутан
Кэбиһэрин кытта
Сиэллэрэн-тэптэрэн,
Айаннатан-астаран,
Уурдаран-оҕустаран
Күн Тэгиэримэ эбэ хотун
Сиэр сылгы
Сиэллээх көҕүлүн
Сигидиччи туппут курдук,
Сис хара тыатын
970 Сэтиэнэх от курдук
Силэйэ көтүтэн,
Силигирэтэ турда.
- 27 -