Page 324 - Неизвестное название

Туруоран кэбистэ.
Нэлэмэн Куо
Үөрэн-көтөн мичилийэн,
Харах-хаас* хамсатан,
Уос-тиис оҥостон,
Убул-субул тыынан
Утуу-субуу саҥара турбут
Хоһоонун эгэлгэтэ
13580 Маннык буолта үһү:
— Дьиэ-буо, дьиэ-буо!
Күн сирин
Көтөрү баттаан көрдөрбүт
Күбэй хотун ийэкэм,
Айыы сирин
Арыйа баттаан көрдөрбүт
Аар-тойон аҕаккаам,
Адьарай бөҕө
Албастааҕар түбэһэммин,
13590 Былаҕай бөҕө
Быһылааныгар былдьатаммын,
Көстүбэт бөҕө күтүрдээҕэ
Күнү көрдөрбөккө,
Биэрэги биллэрбэккэ,
Алдьархайдаах садыамнаах
Аллараа дойду
Адалыйар аҕыс биис ууһугар,
Өлөр өлүү
Ньүкэрэ хара төрүттэрин
13600 Өһөгөйдөөх үөдэнин түгэҕэр
Түһэрэн эрдэҕинэ,
Айыыттан дьулайбатах,
Абааһыттан куттамматах,
Ардьамаан-Дьардьамаан бухатыыр
Ол Аҥардам абааһыны
Харытыттан харбаан,
Тоҥоноҕуттан тутан,
Аат айаҕыттан арааран,
Өлүү дойдутуттан
13610 Өрүһүйэн таһааран,
Ааттаах айыым
Бухатыырдарыгар туттаран,
Уһун тыыммын өрүһүйдэ,
Хаарыан тыыммын хараһыйда.
- 321 -