Page 351 - Неизвестное название

Бэргэнник мэтэриһэн,
Эрчимнээх эрбэхтэринэн
Эпсэритэ тардыһан,
Хапсаҕайдык харбаһан,
Халбархайдык халбарытыһан,
Хардары-таары бырахсан,
Хабыр хапсыһыыны,
14740 Хараабынай тустууну,
Манна туһуннулар.
Сымсаҕайдык хамсаан,
Сылбаргытык туттан,
Сыыһа-халты туттаран,
Тутумаллаах-дорбогойдоох
Дьороҕой тустууну
Манна туһуннулар.
Ол да буоллар
Иккиэн даҕаны
14750 Туппут илиилэрин мүччүрүппэт,
Үктэммит сүһүөхтэрин бүдүрүппэт,
Тирэммит уллуҥахтарын халбарыппат,
Сыыһа туттубат,
Халты харбаабат,
Охтон биэрбэт,
Уола хааттар буоллулар.
Батыйа биитин курдук барааска,
Тиириилээх айа кирсин курдук
Тэбис-тэҥ дьон буоллулар.
14760 Ол курдук кинилэр
Үс күннээх-түүн
Тимэхтэһэн тиийэн
Кэлиэр диэри
Туох баар кыраадыстарынан
Туста сатаан бараннар,
Түөс түөстэриттэн
Төттөрүтэ анньыһан кэбистилэр.
Иккиэн икки аҥыы кэннилэринэн
Дьиэрэҥкэйдэһэн тиийэн,
14770 Очуос таас хайа
Оһуу-тоһуу
Чочумааһын үрдүгэр
Олоро түһэн,
Уоскуйаары гыммыттарын
Үөһээ дойдуттан
- 348 -