Page 358 - Неизвестное название

Кутуруктуун субуллан,
Көҕүллүүн өрүкүһэн,
Туйахтыын төгүрүйэн,
Тус иннилэригэр КЭЛ эн,
Үүннүүн-ыҥыырдыын,
Көптөстүүн-тэһиинниин
15040 Көстөр айыы оҕолоро
Көтүөххэ айылаах
Күөкэс кына түстүлэр.
Билиги гыналларын кытта
Аттарын үрдүгэр
Даллан өксөкү курдук
Дап гына олоро түстүлэр.
Ол гынан баран
Тустуулаах Дьуруо Бөҕө
Саманнык диэн
15050 Саҥа саҥара,
Өс тобула турбут
Хоһоонун эгэлгэтэ,
Маннык буолта үһү:
— Дьиэ-буо, дьиэ-буо!
Охсуһуулаах-мөккүөрдээх
Оҕо Удаарын
Этэр тылым эгэлгэтин
Истэн сэҥээр эрэ!
Былыргы дьылым мындаатыгар,
15060 Урукку хонук уорҕатыгар
Бу түү мээчик курдук
Төкүнүйэн үөскээбит
Түмэн бараан дойду
Түөлбэлээх түһүлгэтэ буолбут
Киэҥ Тумарыкы эбэ хотун
Килэрийэр киинигэр,
Дьогдьойор саалыгар
Тоҕус толуу үрэҕим
Түмүллэр төрдүгэр,
15070 Чуураадыйан сураҕырбыт
Чукдаарыкы Тойон
Чуораадыйан-чугдааран,
Сураҕыран-аатыран
Олорбут эбит.
Ол обургу дьаалы
Туора туолан,
- 355 -