Page 367 - Неизвестное название

Араҕас арыыны
Арылыччы дьыллытан,
Аһаан-сиэн,
Арыаллаһан-айхаллаһан,
Ураҕас тиийбэт
Уйгутун оҥорон,
Уруйдаһан тураннар,
Оонньууну оройуттан тутан,
Көрү көҕүлүттэн харбаан,
15430 Уруу-ыһыах
Уостубат-бараммат
Уйгулааҕа буолла.
Ол уйгу-быйаҥ ортотугар,
Үөрүү-көтүү үөһүгэр
Дьол-соргу түөлбэлээх түһүлгэтин
Туналҕан ньуурун
Томтойор ортотугар
Тустуулаах Дьуруо Бөҕө
Тойон Дьоҥсоруун Баай оҕонньор
15440 Хотун Дьаҥсарыын Баай эмээхсин
Тус иннилэригэр
Сулбу-халбы хааман тиийэн,
Чургурус гынна,
Тохтуу түһэн баран,
Саманнык диэн
Саҥа саҥара турда:
— Дьиэ-буо, дьиэ-буо!
Тойон Дьоҥсоруун Баай оҕонньор,
Хотун Дьаҥсарыын Баай эмээхсин,
15450 Өрөөбүт уоһум
Үгэтин өйдөөҥ,
Хоммут уоһум
Хоһоонун холобурдааҥ.
Аскыт бастыҥын аһапыккытыгар,
Иһиккит үрдүн иһэппиккитигэр,
Дьалкыйбатах кымыстаах
Чороону туттарбыккытыгар,
Баскытыттан атаххытыгар диэри
Балаҕан саҕа барҕа
15460 Баһыыбата тутуҥ!
Аналлаах аргыспын,
Туһааннаах доҕорбун
Тус иннибэр аҕалан,

- 364 -