Page 370 - Неизвестное название

15550 Мөтөрүһэн-итэриһэн кэлэннэр,
Бууттан нохоолоох өртүн
Быһыта-хайыта сотон,
Холтон хоҥнуолаах өртүн
Куду-хады бысталаан,
Түөстэн бүдүргэйдээх өртүн
Түөрүтэ-быһыта отойтолоон,
Бөдөҥ мүһэлэри бөкүнүтэн,
Буһуруччу-соторуччу буһаран,
Симииччэхээн иһиттэргэ
15560 Симэн-ньээкэйэн,
Симиирдээх кымыстары
Тилийэ тиһитэлээн,
Холлоҕостоох арыылары хотолутан,
Толору кымыстаах
Чороон айахтары чуоҕутан,
Үҥкүр кытыйалары үмүөрүтэн,
Ойбон кытахтары олордон,
Кыллаах ыаҕастары кэккэлэтэн,
Араҕас арыыны чэлгитэн,
15570 Сөҥ сүөгэйи сөкүччү кутан,
Үгүс элбэх
Үтэни бэлэмнээн,
Өлгөм ботуччу кэһиини тэрийэн,
Түөлбэ муҥунан чөмөхтөөн,
Үрүт үрдүгэр өрөһөлөөн,
Булгунньах саҕаны
Мунньан кэбистилэр.
Тустуулаах Дьуруо Бөҕө
Аан чэчир ааныгар,
15580 Тоҕой сэлэ таһыгар
Тоҕус томторҕолоох
Чуор маҕан сэргэҕэ
Солоҥдо тураҕас атын
Тумул быһаҕаһын саҕа
Туора баайан,
Туолуннаран кэбистэ.
Холунун тарта,
Дьиримин чиҥэттэ,
Били гынарын кытта
15590 Бөҕө бөтөс уолаттар,
Кылыс-батас кыргыттар
Бэлэмнээбит үтэлэрин,
- 367 -