Page 389 - Неизвестное название

Оноҕос курдук уунна,
Сындыыс курдук сыыйылынна.
Сиэлиттэн силлиэ тыал сирдьигинээтэ,
16370 Көҕүлүттэн күүстээх буурҕа оргуйда,
Кутуругуттан добун холорук доҕордосто.
Атаҕыттан аан холорук аргыстанна.
Быттатын тыаһа
Былыкка быралыйда,
Хаттатын тыаһа
Халлааҥҥа хаһыырда.
Түөрт туйаҕын тыаһа
Сүллээх этиҥ курдук
Ньирилии ньиргийдэ,
16380 Таастан тааска
Сааллан сатараата,
Очуостан очуоска
Охсуллан дуораһыйда,
Сиртэн сири чиэрэстээн
Сиксигэр ньирилээтэ,
Улаҕаттан улаҕа дойдуга
Уораһыйан уһуутаата.
Таас хайа диэн чаҕыйбата,
Турар туруук диэн чугуйбата,
16390 Тостор уораан диэн тохтообото,
Уу диэн тумнубата,
Обоччо диэн иҥнибэтэ,
Бырыы бадараан диэн быгыалаабата.
Туостааҕар кураанахтык,
Түүтээҕэр чэпчэкитик,
Көтүөн эрэ кыната суох
Күүстээх буурҕа курдук
Күлүмэх түргэнник
Күлүрдээн истэ.
16400 Аргыһа күтүрү
Ханан бардаҕай диэн
Иннин диэки,
Элэҥ-сэлэҥ эҥэлдьитэн
Алах-былах
Көрөн аһардаҕына,
Адаарыйан көстөр .
Анараа саҕахтар диэки
Аҥардам, Аҥардам
Айанныыр быһыылаах,

- 386 -