Page 401 - Неизвестное название

Түү мээчик курдук
Төкүнүйэн үөскээбит
Түмэн-бараан дойду
Түҥкэтэх түгэҕин диэки
Түҥкэл-таҥхал түһэн истилэр.
Иирээннээх-илбистээх,
Оһоллоох-ороскуоттаах,
16890 Алдьархайдаах садыамнаах,
Айыылаах андаҕардаах,
Анысханнаах салгыннаах,
Алтай өҥнөөх
Арҕаа халлаан
Алын сиксигин
Арыый соҕуруу муннугун диэки
Соһу былыт ардайдаах,
Дугут былыт оһуордаах,
Дохсун этиҥ дапсыырдаах,
16900 Субурҕа чаҕылҕан дуксуурдаах,
Толон самыыр ыһыахтаах,
Соһу чуоҕур сулустаах,
Чуураан салгыннаах,
Дохсун буурҕалаах
Соҕуруу тумарыктыйар
Добун маҕан халлаан
Суккуллар улаҕатын
Арҕааҥы тардыытыгар
Анысханнаах-силлиэлээх,
16910 Арҕаа халлаан икки
Чуураан салгыннаах,
Соҕуруу халлаан икки
Ытыллар ыпсыытыгар,
Чаҕылҕаннаах тардыытыгар,
Аалсыһар алын сиксигэр,
Будулҕаннаах муннугар
Мэҥилгэннээх бэлэһин,
Бэтиэхтиир куолайын
Аҥылҕаннаах айаҕын
16920 Арыый бэтэрээ өртүгэр,
Төгүрүйдэр төгүрүмтэтэ көстүбэт,
Эргийдэр эргимтэтэ биллибэт,
Түстэр түгэҕин булларбат,
Күнэ көстүбэт күдэриктээх,
Ыйа биллибэт ыыспалаах,
- 398 -