Page 405 - Неизвестное название

Күп гынар күүс быстыбыт,
Сэп гынар сэниэ эстибит,
Нусхаччы туймаарбыт,
Өлүгүрэ оһон,
Өлбөөдүччү көрөн,
17060 Тарайа уҥан,
Тыын ылаары,
Тыыллыы тэбэн,
Сытынан кэбиспит.
Утарыта киирсибит
Уордаах бухатыырдар
Охсуһуу оһоллооҕун охсустулар,
Кырбаһыы гиэнэ
Кытаанаҕын кырбастылар,
Тэбиэлэһии гиэнэ
17070 Чиҥин тэбиэлэстилэр,
Эттэрин ыарыытыттан
Эрчимирэн истилэр,
Сутуруктарын тыаһыттан
Сүһүрэн түһүстүлэр,
Тилэхтэрин тыаһыттан
Тэбиэриһэн тиистилэр,
Уллуҥахтарын тыаһыттан
Омуннанан-төлөннөнөн,
Оҕустахтарын аайы
17080 Ордук уоҕуран
Охсуһан истилэр.
Кыдьыгыран туран
Кырбаһан бардылар,
Илбиһирэн туран
Эттэһэн истилэр,
Дэриэспэ тааһы
Дэлбэритэ тэптилэр,
Күрэ тааһы
Көмүрүө хаар курдук
17090 Көҥүтэ үктээтилэр,
Суорба таастары
Суура муус курдук
Тоҕута тэбистилэр.
Туруук хайалар дуораһыйдылар,
Тараҕай таастар сатарыстылар,
Бэтэрээ хайалар мэҥирэстилэр,
Анараа хайалар маҥырастылар.
- 402 -