Page 406 - Неизвестное название

Түгэх дойду ньүрүһүйдэ,
Улаҕа дойду уораһыйда,
17100 Улуу тумара байҕал
Ортотуттан оргуйда,
Түгэҕиттэн түллэҥнээтэ,
Сиксигиттэн дэбилийдэ,
Таһынан дьалкыйда,
Таһымнаан таҕыста,
Үөһүттэн үллэн,
Үөһэнэн өрүкүйэн,
Үллэн-түллэн
Угуттаан килэдийдэ,
17110 Мотуоктаан бурулуйда,
Халааннаан халыһыйда,
Тиэрэ дэбилийдэ,
Сири-дойдуну тимиртэ,
Тыынар тыыннааҕын,
Көтөрүн-сүүрэрин,
Хамсыырын харамайын
Биирдэ таһырдьа дьалкыйда,
Биирдэ иһирдьэ эҕирийдэ.
Ол курдук уораһыйа
17120 Дьалкыйа турда.
Бу дойду көстүбэтэ күрэнэн
Көппөйө сүүрдэ,
Илиэһэйэ тэскилээн
Бэгидиһэ-бэриһэ сиэллилэр.
Абааһылара тарҕанан
Арҕам-тарҕам айаннаан,
Арбахтаах бэс саҕа
Адаарыһа түстүлэр.
Охсуһа турар бухатыырдар
17130 Омуннара тохтообото,
Уордара хараабата.
Ордук сытайан,
Уоҕуран-күүһүрэн,
Охсуһа турдулар.
Ол курдук кинилэр
Тоҕус күннээх-түүн
Томтойо-торолуйа
Туолан кэлиэр диэри
Тохтоло туруута суох
17140 Дохсуннук туруулаһан,
- 403