Page 415 - Неизвестное название

Аҕыс аҥылҕан айаан
Анараа таһаатыгар
Тоҕус дьулаҕай туруук
Улаҕа өртүгэр,
Сэттэ иччитэ
17490 Килбэй кэтэх өртүгэр
Сир гиэнэ чиэскитигэр,
Түбэ гиэнэ түҥкэтэҕэр
Түҥкэл-таҥхал түһэн кэллилэр.
Тустуулаах Дьуруо Бөҕө
Суорба тааска дурдаланан,
Хайыр тааска хаххаланан,
Күрэ тааска күлүктэнэн,
Киистии кирийдэ,
Саһыллыы саста.
17500 Аҥардам бухатыыр
Сытар сырҕан эһэ саҕа
Сымара таас анныгар
Хороон хастан,
Хомурдуос курдук хорҕойдо,
Күлгэри курдук күлүктэннэ,
Чиэрбэ курдук тимирэн, иҥэн
Им-дьим, ылы-чып
Саһан хааллылар.
Били гыналларын кытта
17510 Өр-өтөр буолбата
Дьулаҕай турууктар төбөлөрө
Дохсун буурҕанан оргуйан,
Суорба таастар тоорохойдорун
Лоһугураччы тибэн,
Туман оргуйда,
Күдэн өрүкүйдэ,
Тараҕай таастар
Часкыйар саталанан,
Сата буурҕа сатыылаан,
17520 Чакыыр таастары
Чачыгыраччы типтэ.
Курааһы тыал куугунаата,
Хобдох салгын куһуурда.
Күкүр хайалар күҥкүнэстилэр,
Тараҕай таастар часкыйдылар,
Кылыр-халыр хаһыҥыраата,
Чалыр-чулур чаҥырҕаата,

- 412 -