Page 418 - Неизвестное название

Онно көрдөххө,
Кырдьык даҕаны
Кыыс оҕо кырыктааҕа,
Дьахтар киэнэ садыамнааҕа,
Адьарай гиэнэ
Ардай аһыылааҕа,
17620 Көстүбэт гиэнэ
Күтүрдээх дьүһүннээҕэ,
Сирэй-харах
Сириттэн-хайыттан,
Уос-тиис
Оботтонон-тумустанан,
Тырыта тыытыах
Тыҥыраҕа сарбайан,
Айаҕа дьаллайан,
Аһыыта ардьайан,
17630 Сымыһаҕа дьэллэйэн,
Сыраана санньылыйан,
Сабардаан-бүрүүкээн олордо.
Ол олордоҕуна
Аҥардам бухатыыр
Этин тыылыннарда,
Иҥиирин күүртэ,
Күүһүн киллэрдэ,
Көппөйө үлүннэ,
Эмискэччи үлүгэр
17640 Абааһы кыыһын
Атаҕын аннынан
Биир күүстээх тыынынан
Күллэри-көмөрдөрү,
Уоттары тууспаннары
Өрө үрэн
Өрүкүтэн таһаарда,
Сырҕан эһэ курдук часкыйбытынан
Сулбу ойон таҕыста.
Абааһы кыыһа
17650 Тиэрэ таһылла түстэ,
Атаҕа адаарыйда,
Үстэ үҥкүрүйдэ,
Түөртэ төкүнүйдэ,
Уолуйан-соһуйан
Ойон турда.
Аҥардам бухатыыр
- 415 -