Page 419 - Неизвестное название

Итинник бэйэлээх
Үтүөкэн барахсаны
Ириэнэх суолун ирдээн,
Эккирэтэн көрүөҥ дуо?
Холлоох кумуулааҕа,
Куоһаран-баһыйан
Быһый атахтаах бастыҥа
17750 Быһалыы түһэҥҥин,
Ситэр күннээх буоллаххына,
Номоҕон соҕустук туттан
Чугаһаан көрөөр,
Кэрсиэтик кэпсэтэн,
Намыыннык саҥаран,
Наллаан аргыый
Санаатын билэн,
Сыһыарыах буоллаҕына,
Сыстаҥнаан көрөөр.
17760 Дьэ, эр бэркин биллэр,
Хорсуҥнун көрдөр,
Аналлаах аргыһым,
Аҥардам атаһым, — диэтэ.
Инньэ диирин кытта
Аҥардам бухатыыр
Айаҕын атан
Алларастыы түстэ,
Түһэҕин охсунна.
Төбөтүнэн хойуостанна,
17770 Тииһин хабырынна,
Сымыһаҕын быһа ытырда,
Үөгүлүү түстэ,
Өрүтэ ойуолаата.
Абааһы кыыһа барбыт сирин диэки
Аҥардам, Ан ардам,
Аҥардам сүүрэ турда.
Тустуулаах Дьуруо Бөҕө
Солоҥдо тураҕас атын
Үс төгүл хоруутуурун кытта
17780 Көрөн баран чыпчылыйыах
Бэтэрээ өртүгэр,
Этэн баран эҕирийиэх
Ис кырыытыгар,
Иннигэр кэлэн
Хорус гына түстэ.
- 418