Page 417 - Неизвестное название

Олооччум уһулунна,
Уллуҥаҕым саралаата,
Сыта түһэн сынньаныахха,
Олоро түһэн уоскуйуохха,
Аһыы түһэн өллөнүөххэ,
Өйү-төйү булунуохха, — диэн,
Ыллаан-туойан,
Ыһыахтанан кэлэн,
Аҕылаан-мэҥилээн,
17580 Аҥардам бухатыыр үрдүгэр
Тохтуу түстэ,
Олоро биэрдэ.
Кутаа уоту куугуначчы отунна,
Икки үөрбэ-батас
Обот хара үтэһэҕэ
Бииригэр киһи аҥаарын,
Бииригэр сүөһү аҥаарын
Үөргү-сүөргү
Үөлүтэлээн баран,
17590 Уотугар суоһаата
Туора-маары
Туруорута анньан кэбистэ.
Бэйэтэ буоллаҕына
Сытар сырҕан эһэ саҕа
Сымара таас үрдүгэр
Туора миинэн
Аччаччы тэбинэн,
Уотугар сыламнаан,
Олорунан кэбистэ.
17600 Ол олорон
Утаакы буолбата
Уотугар уктанан,
Сылааска сыламнаан,
Этэ сылыйан,
Иэнэ ирэн,
Көхсө нухарыйан,
Көппөйө утуктаан,
Устунан утуйан,
Умсары тайахтанан,
17610 Мунна буугунаан,
Таныыта дьалтайан,
Сымыһаҕа дьэлтэйэн,
Таҥнары сатыылаан олордо.

- 414 -