Page 423 - Неизвестное название

Был ас аҥаара былтас гынна,
Түөс аҥаара түөрэс гынна,
Уҥуох устата уунах гынна,
Хаҥкыр гына олоро түстэ,
Тарас гына сыта биэрдэ,
17920 Дьигиһис гынан туран кэллэ,
Саманнык диэн
Саҥа саҥаран,
Часкыйбахтыы турда:
— Алааттар-улаатыгар,
Иһилигим-таһылыгым,
Иэхэйикпин-чуохайыкпын,
Имэҥ-татай иһиликпин,
Сырбаҥ-татай саһыйыкпын,
Курбаҥ-татай куһуйукпун!
17930 Ол иһин даҕаны
Мин диэтэх киһи
Бэлиэ кэрэ аатым
Мэччийбитэ-тэнийбитэ,
Туналҕан ньуурум
Сураҕырбытын иһин
Туспа-туора дойдулар
Дуолан бухатыырдара,
Дьулурҕа хара уолаттара
Суудайан ымсыыран,
17940 Сонордоһон тураннар,
Туһааннаах доҕор оҥостоору,
Тоҕуоруһан аххан биэртэрэ.
Бэйэбэр эрэ тэҥниири
Биири да билбэтэҕим,
Дьүөрэ дьүһүннээхпин,
Сөбүлүү саныырбын
Төрүт да көрбөтөҕүм.
Ол иһин даҕаны
Дэлби сиритэлээн,
17950 Барыларын батыталаан,
Адьас аккаастаан,
Атахпынан тэбитэлээн,
Атаартаан испитим.
Орто дойду *
Одьунаас уолаттарын
Ураҕаһынан үүртэлээн,
Утаара турбутум.
- 422 -