Page 456 - Неизвестное название

19420 Үөрэн-көтөн
Мичилийэн кэлэннэр,
Утарыта куустуһан,
Уураһан-сыллаһан бардылар.
Эбэлэрэ Кыыс Ньургун бухатыыр
Утуу-субуу саҥара,
Убул-субул тыына турбут
Хоһооно-эгэлгэтэ маннык үһү:
— Дьиэ буо, дьиэ буо!
Тустуулаах Дьуруо Бөҕө
19430 Абыраллаах-көмүскэллээх
Ахтар Айыыһыт хатыттан
Анаан-минээн
Айыллан көстүбүт,
Алтан түөстээх
Айыы далбарайым оҕотоо,
Атын дайдылар
Араскааттаах-айдааннаах
Аартыктарын арыйан,
Туора дойдулар
19440 Содуомнаах олурҕалаах
Суолларын тобулаҥҥын,
Эрэй бөҕөнү
Эҥээргинэн эҥсэҥҥин,
Муҥ бөҕөнү
Муннугунан тыыраҥҥын,
Үтүөнү кытта үтүрүһэн,
Бэрди кытта мэккиһэн,
Ааһар бөҕө
Албастаахтан ааһан,
19450 Куотар бөҕө
Кубулҕаттаахтан куотан,
Бөҕө бүлгүннээхтэн бүдүрүйбэккэ,
Тэтиэнэх тиҥилэхтээхтэн тэмтэрийбэккэ,
Тэгил дойдуттан
Тэҥнээххин булан,
Сэттэ былас суһуохтаах
Нэлэмэн Куону
Тэллэххэ сытар
Тэҥнээх доҕор оҥостон,
19460 Ситиһэн -хотуһан
Тиийэн кэлбиккинэн
Үөрэ-көтө,
- 457 -